السلام عليكم ورحمة الله وبركاته
قصيده اضعها بين ايديكم وهي من وحي الخيال
لعل الخيال يوسع افاق الابداع بالنص اكثر من الواقع
وكما قال الادباء ((اعذب الشعر اكذبه))
اترككم مع النص
الله من حكم الزمن وقدوره
والله من ظلم الزمان وجوره
يبكي بشوفة ضحكتي والبسمه
ويضحك بشوفة دمعتي منثوره
يزرع ويحصد من دموع عيوني
والعين تسكب دمعها مجبوره
شاف الورود تسامر وتضحك له
وفوق الغصون تغني العصفوره
سرّه المنظر واضحكن سنونه
وعينه تناظر ضاحكه مسروره
لا يازمن ما تكتفي بدموعي
ولا كفاك من الحصاد زهوره
قطعت من بين الحنايا ورده
اغلى ورود العشق بالمعموره
لا يابعد من سر عينه شوفي
ومن سر عيني شوفته وحضوره
لا يابعد من يقصدون بـ (عليا)
ومن يقصد بـ(نوره) وطلت (نوره)
تذكر حبيبي يوم اجي متضايق
واشكيلك صدود الزمن وقصوره
تقول ربي ما يخلي عبده
والناس من فضل الولي مستوره
ما ابيك تشري لي سوار وخاتم
ولا أبي نفنوف او تنوره
ابيك سالم من شرور الدنيا
ومن جور دورات الزمن ودهوره
فقدت بعيونك بريق احساسك
وفقدت في قلبك صفاة شْعوره
فقدت همسك..لمسك..وبسماتك
وطلة جبينك لا تشعشع نوره
تبي الصراحه...ما فقدتك وحدك
فقدت صافي هالزمن وطهوره
فقدت امّه ما بعدها امّه
مبني على حكم الوفا دستوره
صدقني لو انسى حبيبي اسمي
ما انساك...لو ينسى الأثر مأثوره
يبقى لصوتك في اذوني مسمع
ويبقى لرسمك في خيالي صوره
ودام الزمن قدر رحيلك عني
بذكرك صوره للزمن مذكوره
